कशेडी घाटात टॅंकर उलटला 

पोलादपूर : मुंबई-गोवा महामार्गावर अपघाताचे सत्र सुरूच असून पोलादपूरनजीक कशेडी घाटात खेडकडे जाणारा टॅंकर अवघड वळणावर उलटला. ही घटना धामणदेवी गावाच्या हद्दीत मंगळवारी सकाळी साडेआठ वाजता घडली. या घटनेत सुदैवाने कोणतीही जीवितहानी झाली नाही. 

मुंबई-गोवा महामार्गावर कशेडी घाट महत्त्वाचा मानला जातो. मंगळवारी सकाळी साडेआठ वाजता टॅंकरचालक संग्राम नामदेव मोरे (वय 49, रा. लातूर) यांचे अवघड वळणावर टॅंकरवरील नियंत्रण सुटले. त्यामुळे धामणदेवी गावाच्या हद्दीत टॅंकर पलटी झाला. या घटनेत सुदैवाने चालक मोरे यांना कोणतीही दुखापत झाली नसल्याचे पोलिसांनी सांगितले.

या घटनेची माहिती समजताच कशेडी महामार्ग पोलिस मदत केंद्राचे सहायक फौजदार बोडकर यांनी पोलिस कर्मचाऱ्यांसह घटनास्थळी धाव घेऊन मदतकार्य सुरू केले. त्यानंतर या महामार्गावरील वाहतूक पूर्ववत झाली.