कल्याणकरांनो, थोडा त्रास सहन करा!

कल्याण -  कल्याण रेल्वे स्थानकाचा विमानतळाच्या धर्तीवर विकास करण्याचा रेल्वे मंत्रालयाचा मानस आहे. यासाठी तांत्रिक मंजुरी प्रकियेला वेळ लागत असल्याने नागरिकांनी थोडा त्रास सहन करावा, असा सल्ला भिवंडीचे भाजप खासदार कपिल पाटील यांनी कल्याणकरांना दिला आहे. त्यांच्या हस्ते कल्याण रेल्वे स्थानकातील तिकीट घराचे उद्‌घाटन सोमवारी झाले.

या वेळी स्टेशन मास्तर प्रदीपकुमार दास, कल्याण भाजप शहर अध्यक्ष प्रेमनाथ म्हात्रे, नगरसेवक दया गायकवाड, अर्जुन भोईर, सचिन खेमा यांच्यासह मोठ्या संख्येने भाजप पदाधिकारी, रेल्वे अधिकारी-कर्मचारी उपस्थित होते. या वेळी पत्रकारांशी बोलताना खासदार कपिल पाटील यांनी विमानतळाच्या धर्तीवर कल्याण रेल्वे स्थानकाचा विकास करण्याचा रेल्वे मंत्रालयाचा मानस असल्याचे सांगितले. यासाठी ९६० कोटी रुपयांची घोषणा करण्यात आली; मात्र प्रस्ताव प्रक्रियेला वेळ लागत असल्याचे नमूद केले. वासिंद रेल्वे स्थानक परिसरातील फूटओव्हर ब्रिजच्या (एफओबी) कामाला सुरुवात झाली आहे. मार्चच्या पहिल्या आठवड्यात बदलापूर रेल्वे स्थानकातील होम प्लॅटफॉर्मचा भूमिपूजन सोहळा पार पडणार असल्याचे त्यांनी सांगितले. तसेच आणखी काही वर्षे मोदी सरकारचीच सत्‍ता असेल, असा दावाही त्‍यांनी केला.

सकाळ'ला सोशल मीडियावर लाईक करा :
'सकाळ' फेसबुक : @SakalNews
'सकाळ' ट्विटर : @eSakalUpdate
इन्स्टाग्राम : @esakalphoto