गोपनीय कागदपत्रे देण्यास नकार

मुंबई - शहरी नक्षलवादाचा आरोप असलेले लेखक गौतम नवलखा यांच्याविरोधात दाखल केलेली गोपनीय कागदपत्रे नवलखा यांना देण्यास मंगळवारी राज्य सरकारने स्पष्ट नकार दिला. गोपनीय माहिती बाहेर येऊ शकते, असा दावा या वेळी सरकारने केला. 

पुणे पोलिसांनी एल्गार परिषद आणि कोरेगाव भीमा दंगलप्रकरणी नवलखा यांच्याविरोधात नक्षलवाद्यांशी संबंध असल्याचा गुन्हा दाखल केला आहे. ही फिर्याद रद्द करण्यासाठी नवलखा यांनी न्यायालयात याचिका केली आहे. याचिकेवर आज न्या. रणजित मोरे आणि न्या. भारती डांगरे यांच्या खंडपीठापुढे सुनावणी झाली. पोलिसांनी नवलखा यांच्या लॅपटॉपमधील काही कागदपत्रे आणि डेटा जप्त केला आहे; तसेच अन्य साक्षीदारांनी दिलेल्या जबानीचे पुरावेही दाखल केले आहेत.