समुद्रात बोटींना ५ ऑगस्टपर्यंत बंदी

मुंबई : हवामान खात्याच्या अंदाजानुसार समुद्रातील हवामान धोकादायक असून येत्या ५ ऑगस्टपर्यंत मच्छीमार बांधवांनी बोटी समुद्रात नेऊ नयेत, असा इशारा रायगड जिल्ह्याचे मत्स्य विभागाचे सहायक आयुक्त अभयसिंग शिंदे-इनामदार यांनी दिलेल्या पत्राद्वारे दिला आहे.

या सूचना मच्छीमार बांधवांना देण्यासाठी मच्छीमार सोसायट्यांच्या कार्यालयातील नोटीस फलकावर आणि डिझेल पंपावर लिहिण्यात याव्यात, असे आवाहनही सहाययक आयुक्तांनी केले आहे.  सरकारने १ जून ते ३१ जुलै या दोन महिन्यांसाठी खोल समुद्रात मासेमारीसाठी बंदी घातली होती. १ ऑगस्टपासून  मासेमारीची बंदी उठल्‍याने मच्छीमार बांधवांनी मासेमारीसाठी तयारी केली. गुरुवारी झालेल्‍या अपघातात  सुदैवाने आठ खलाशी बचावले; मात्र नाखवा कुटुंबीयांवर आर्थिक संकटाचा डोंगर कोसळला. त्यामुळे असे अपघात होऊ नयेत, याकरिता ५ ऑगस्टपर्यंत बोटी न पाठविण्याच्या सूचना दिल्‍या. 

शासनाने घातलेली बंदी १ ऑगस्टपासून उठली असली तरीही हवामान खात्याने दिलेल्या अहवालानुसार ५ तारखेपर्यंत समुद्र खवळलेला असणार आहे. त्यामुळे आम्ही सोसायट्यांना पत्रक देऊन त्यांच्या फलकांवर लावण्यास सांगितले आहे.
- अभयसिंह शिंदे-इनामदार, सहायक आयुक्त, मत्स्य विभाग, रायगड 

शासनाने दिलेली दोन महिन्यांची मासेमारी बंदी संपल्याने; तसेच समुद्रात तीन नंबरचा बावटा लावला नसल्याने कोळीबांधव मासेमारीसाठी समुद्रात गेले होते.
- भालचंद्र नाखवा, चेअरमन, करंजा मच्छीमार सोसायटी