शिवसेनेच्या 32 पदाधिकाऱ्यांचे राजीनामे

पनवेल - विधानसभा निवडणुकांच्या तोंडावर पनवेलमधील शिवसेना पक्षात गटबाजीला उधाण आल्याचे पाहायला मिळत आहे. एका गटाच्या कार्यकर्त्यांना वरिष्ठ नेत्यांकडून नव्याने पद बहाल करण्यात आल्याने आपल्यावर अन्याय करण्यात आल्याच्या भावनेने शिवसेनेच्या ३२ आजी-माजी पदाधिकाऱ्यांनी आपला राजीनामा पक्ष श्रेष्ठींकडे पाठवला असल्याची माहिती कळंबोली उपविभागप्रमुख महेंद्र पवार यांनी दिली आहे.

राजीनामा दिलेल्यांमध्ये सेनेचे कळंबोली शहरप्रमुख अविनाश कोंडिलकर यांचाही समावेश आहे. कोंडिलकर यांच्या पदावर नीलेश भगत यांची शहर प्रमुखपदी नियुक्ती करण्यात आल्याने कोंडिलकर यांनी राजीनामा दिल्याचे सांगण्यात येत आहे. राजीनामा देणाऱ्यांमध्ये कोंडिलकर यांच्यासह उपशहर प्रमुख सचिन मोरे, शहर संघटक विवेक गडकरी, उपशहर प्रमुख अविनाश पाटील, विभागप्रमुख घनशाम नाईक, विभागप्रमुख संभाजी चव्हाण, विभागप्रमुख विश्‍वास पेटकर, शिरीष सावंत, नीलेश घुले या प्रमुख पदाधिकऱ्यांचाही समावेश आहे. विधानसभा निवडणुकीचे वेध लागल्याने तालुक्‍यातील प्रत्येक पक्षातील पदाधिकारी व कार्यकर्ते पक्ष बांधणीच्या कामाला लागले आहे.