शिवसेनेला पुन्हा ‘अवजड’चे ओझे

मुंबई - राष्ट्रीय लोकशाही आघाडीतील (एनडीए) प्रमुख घटक पक्ष असलेल्या शिवसेनेच्या पदरी १८ खासदार असतानाही पुन्हा निराशा पडली आहे. पंतप्रधान नरेंद्र मोदींच्या मंत्रिमंडळात शिवसेनेच्या अरविंद सावंत यांचा केंद्रीय मंत्री म्हणून समावेश करण्यात आला असला तरी, खातेवाटपात शिवसेनेला अवजड उद्योग हे नेहमीचेच खाते देण्यात आले आहे. यापूर्वीही मनोहर जोशी, अनंत गीते यांनी सांभाळलेले अवजड उद्योग खाते आता सावंत यांच्याकडे सोपविण्यात आले आहे. यामुळे खातेवाटपात शिवसेनेचा अपेक्षाभंगच झाल्याची चर्चा आहे.

लोकसभा निवडणुकीपूर्वी एकमेकांवर जोरदार टीका करणाऱ्या शिवसेना-भाजपने लोकसभा निवडणुकीसाठी युती केली. सर्व आलबेल झाल्याने शिवसेनेला केंद्रात वजनदार मंत्रिपद मिळेल, अशी अपेक्षा होती. शिवसेनेला केंद्रात यापूर्वी दोन वेळा अवजड उद्योग खाते मिळाले होते. शिवसेना मात्र या खात्यावर कधीच खूश नव्हती. शिवसेनाप्रमुख बाळासाहेब ठाकरे यांनी या खात्याविषयी बोलताना अवजड उद्योग खाते म्हणजे ‘अवजड जागेवरील दुखणे’ असल्याचे अनेकदा बोलून दाखवले होते. शिवसेना पक्षप्रमुख उद्धव ठाकरे यांनाही हे खाते फारसे रुचलेले नाही. त्यांना अवजड उद्योग खाते सोडून रेल्वे, नागरी विमान वाहतूक, उद्योग खाती मिळावीत, ही अपेक्षा होती. मात्र, आता सावंत यांना नाइलाजाने या खात्याचा कारभार हाकावा लागणार आहे.