सरसकट कर्जमाफी द्या - अजित पवार

सकाळ वृत्तसेवा
गुरुवार, 20 जून 2019

आम्ही सत्तेत असताना १० कोटींचा निधी विकासकामांना घेतला, तर विरोधी आमदारांना ५ कोटींचा निधी देत होतो. परंतु, सध्या तशी पद्धत वापरली जात नाही. निधीत दुजाभाव सरकारकडून केला जात आहे. त्यामुळे दुजाभाव होऊ देऊ नका. सर्वच दिवस सारखे नसतात, हे लक्षात घ्या.
- अजित पवार, राष्ट्रवादीचे नेते

मुंबई - विरोधी पक्षनेते असताना राधाकृष्ण विखे पाटील यांनी जनतेच्या समस्यांचा डोंगर सरकारसमोर मांडला; परंतु हेच विखे आज ‘ठगां’मध्ये’ जाऊन कधी बसले तेच कळले नाही, असा टोला राष्ट्रवादी काँग्रेसचे विधिमंडळ पक्षनेते अजित पवार यांनी लगावला. शेतकऱ्यांची फसवणूक, थट्टा केली जात आहे. त्यामुळे शेतकऱ्यांना सरसकट कर्जमाफी द्यावी, अशी मागणीही अजित पवार यांनी केली.

राज्यपालांच्या अभिभाषणावर बोलताना अजित पवार यांनी बालभारतीच्या नवीन शिक्षणपद्धतीचे वाभाडे काढले. ही पद्धत विद्यार्थ्यांचे वाटोळे करणारी आहे, असेही अजित पवार म्हणाले. विनोद तावडे यांनी शिक्षणमंत्री असताना ही नवीन पद्धत आणली. त्यामुळेच त्यांना मुख्यमंत्र्यांनी बाजूला केले आणि शेलारांना शिक्षणमंत्री केले आहे का, असा सवाल करतानाच आता शेलार त्यात दुरुस्ती करतील, असा टोलाही अजित पवार यांनी लगावला. शिवसेनेने निष्ठावान शिवसैनिकांना डावलून जयदत्त क्षीरसागर यांना मंत्रिपद दिले. हा सामान्य शिवसैनिकांवर अन्याय आहे. त्यांनी किती काळ तुमच्या सतरंज्या उचलायच्या? असा टोला उद्धव ठाकरे यांना लगावला. सहा मंत्र्यांना वगळण्यात आले; त्याचे कारण काय? याचे कारण सभागृहाला कळायला हवे, असे पवार म्हणाले.


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Simultaneous debt relief Ajit Pawar