मद्यधुंद अवस्थेत एस.टी. चालवणाऱ्या चालकाची हकालपट्टी

सकाळ वृत्तसेवा
शुक्रवार, 26 जुलै 2019

गुरुवारी (ता.25) पुण्यातील शिवाजीनगर बसस्थानकावर अमोल चोले या एसटी चालकाने मद्यपान करून बेकायदेशीर रित्या एसटीच्या शिवशाही बसचा ताबा घेऊन, बेदरकारपणे सदर बस चालवून अपघात घडवला.

मुंबई : मद्यधुंद अवस्थेमध्ये एसटी बस चालवून प्रवाशांच्या जीवाशी खेळ करणाऱ्या मुजोर चालकाची एसटीच्या सेवेतून हकालपट्टी करण्यात आली आहे. तसेच अशा प्रकारचे कृत्य करणाऱ्या एसटी कर्मचाऱ्यास आपल्या नोकरीला कायमचे मुकावे लागेल, अशी कडक नियमावली प्रशासनाने राबवावी, असे निर्देश परिवहन मंत्री व एसटी महामंडळाचे अध्यक्ष दिवाकर रावते यांनी प्रशासनाला दिले आहेत.

गुरुवारी (ता.25) पुण्यातील शिवाजीनगर बसस्थानकावर अमोल चोले या एसटी चालकाने मद्यपान करून बेकायदेशीर रित्या एसटीच्या शिवशाही बसचा ताबा घेऊन, बेदरकारपणे सदर बस चालवून अपघात घडवला. या घटनेची गांभीर्याने दखल घेऊन परिवहन मंत्री दिवाकर रावते यांनी संबंधित चालकावर कडक कारवाई करण्याचे निर्देश एसटी प्रशासनाला दिले होते. त्यानुसार पुणे विभाग नियंत्रकांनी सदर चालकाला एसटीच्या सेवेतून बडतर्फ केले.

प्रवासी हे दैवत समजून त्यांना सेवा देणाऱ्या एसटीच्या कर्मचाऱ्यांनी प्रवासामध्ये त्यांना सुरक्षित व सौजन्यशील सेवा देण्याचे व्रत अंगिकारले पाहिजे, जेणेकरून एसटीवरचा प्रवाश्यांच्या अढळ विश्वासाला कोठेही तडा जाणार नाही. उपरोक्त प्रसंगासारख्या गैर कृत्यामुळे एसटीची प्रतिमा मलिन होणार नाही, याची काळजी एसटीच्या सर्वच कर्मचाऱ्यांनी घेणे गरजेचे आहे, असे प्रतिपादन रावते यांनी याप्रसंगी केले. तसेच एसटीच्या कर्मचाऱ्यांना मारहाण करणाऱ्या मुजोर रिक्षा चालकावर कडक कारवाई करून, निर्भयपणे काम करण्यासाठी एसटी कर्मचाऱ्याला धीर दिला.

त्याचप्रमाणे या कारवाईतून, बेशिस्त वर्तन करून प्रवाशांच्या जीवाशी खेळणाऱ्या बेजबाबदार एसटी कर्मचायांना देखील एसटीच्या सेवेतून बडतर्फ करून प्रवाशांना सुरक्षित सेवा देण्याच्या उद्दिष्टाला एसटीकडून कधीही गालबोट लागणार नाही, याची दक्षता घेतली जाणे अपेक्षित आहे, असे रावते यांनी सांगितले.


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: ST driver who drive bus after drunken was dismissed