एसटी कर्मचाऱ्यांचे उद्या आंदोलन 

मुंबई : फक्त 2500 रुपये दिवाळी भेट मिळणार असल्यामुळे एसटी महामंडळातील कामगारांमध्ये नाराजी आहे. त्यामुळे मान्यताप्राप्त कामगार संघटनेने शुक्रवारी (ता. 25) संपूर्ण राज्यात "निर्देश' आंदोलन करण्याचा इशारा दिला आहे. 

राज्य मार्ग परिवहन महामंडळातील कामगारांना सरकारच्या निर्णयानुसार थकबाकीसह तीन टक्के महागाई भत्ता, ऑक्‍टोबरचे वेतन व सानुग्रह अनुदान दिवाळीपूर्वी द्यावे; तसेच 12 हजार 500 रुपये उचल द्यावी आदी मागण्यांसाठी 25 ऑक्‍टोबरला राज्यभरात "निर्देश' आंदोलन करण्याची नोटीस कामगार संघटनांनी एसटी महामंडळाला दिली होती. त्यावर महामंडळाने 23 सप्टेंबरला पत्रक प्रसिद्ध करून कामगारांना मागील वर्षाप्रमाणेच यंदाही दिवाळी भेट म्हणून 2500 रुपये निवडणूक आयोगाच्या मंजुरीनंतर देण्याचे आश्‍वासन दिले होते. 

वाढीव तीन टक्के महागाई भत्ता ऑक्‍टोबरच्या वेतनात देण्यात येईल, असे जाहीर करण्यात आले होते. त्यामुळे एसटी कामगारांमध्ये नाराजी पसरली आहे. प्रशासनाने कामगारांच्या मागण्यांवर निर्णय न घेतल्याच्या निषेधार्थ 25 ऑक्‍टोबरला संपूर्ण राज्यात "निर्देश' आंदोलन करण्याचा इशारा संघटनांनी दिला आहे.