शिवसेनाप्रमुखांच्या स्मारकाचे काम लवकरच सुरू 

भाईंदर - शिवसेनाप्रमुख बाळासाहेब ठाकरे यांच्या स्मारकाला राज्य सरकारने मंजुरी दिली आहे. त्यांचा जीवनपट उलगडून दाखवणारे सांस्कृतिक भवन आणि कलादालन उभारण्यासाठी शिवसेना पाठपुरावा करत होती. त्यानुसार या स्मारकाचे काम लवकरच सुरू होणार असून, मिरा-भाईंदर महापालिका पुढील महिन्यात निविदा काढणार आहे. 

मिरा-भाईंदर शहरात शिवसेनाप्रमुख बाळासाहेब ठाकरे यांचे भव्य स्मारक उभे रहावे, यासाठी आमदार प्रताप सरनाईक यांनी राज्य सरकार आणि महापालिकेकडे पाठपुरावा चालवला होता. राज्य सरकारच्या नगरविकास विभागाने 6 जूनला महापालिका आयुक्त बालाजी खतगावकर यांना आदेश पाठवला आहे. त्यानुसार महापालिकेच्या मंजूर विकास योजनेत भाईंदर पूर्व येथील आरक्षण क्रमांक 122 खेळाचे मैदान आणि सामाजिक वनीकरणासाठी राखीव आहे. 

हे आरक्षित क्षेत्र 46 हजार 700 चौरस मीटर असून, त्यापैकी 30,533.60 चौरस मीटर जागा महापालिकेच्या ताब्यात आली आहे. याच जागेतील 4580.04 चौरस मीटर जागेवर तळमजला अधिक पहिला मजला असे स्मारक उभारावे, असे त्या आदशात म्हटले आहे. या कलादालनात शिवसेनाप्रमुखांची भाषणे, त्यांची छायाचित्रे, त्यांनी काढलेली व्यंगचित्रे मांडली जाणार असून त्याद्वारे त्यांचा जीवनपट उलगडून दाखवण्यात येणार आहे. 10 ऑगस्टपर्यंत महापालिकेच्या नगरविकास विभागाकडून स्मारकाच्या आराखड्याला मंजुरी दिली जाईल. त्यानंतर लगेच निविदा प्रक्रिया सुरू करून काम सुरू केले जाईल, असे महापालिका आयुक्त खतगावकर यांनी आमदार सरनाईक यांना सांगितले.