Nepal Plane Crash: ठाण्यातल्या कुटुंबाला कोर्टाने जवळ आणलं पण काळाने हिरावलं!

नेपाळमध्ये २५ जणांना घेऊन जाणारं विमान कोसळल्याने मोठी दुर्घटना घडली आहे. या विमानात २२ प्रवासी आणि तीन कर्मचारी होती. यामध्येच महाराष्ट्रातल्याही एका कुटुंबाचा समावेश होता. कोर्टाच्या आदेशामुळे हा सगळा परिवार एकत्र येण्याची स्वप्नं बघत होता. मात्र या अपघाताने त्यांची स्वप्नं कायमची हिरावून घेतली. (Maharashtra Family in Nepal Plane Crash)

अशोक त्रिपाठी, वैभवी बांदेकर आणि त्यांची दोन मुलं धनुष आणि मुलगी रितिका हा परिवार अद्याप बेपत्ता आहे. अशोक आणि वैभवीचा घटस्फोट झाला होता. मात्र कोर्टाने या दोघांना दरवर्षी पूर्ण परिवारासोबत काही काळ एकत्र राहण्यास सांगितलं होतं. याच आदेशामुळे त्यांनी नेपाळमध्ये १० दिवस फिरायला जायचं ठरवलं होतं. तीन दिवसांपासून हे कुटुंब नेपाळमध्येच (Nepal Plane Crash) होतं. तिथल्याच एका शहरात फिरायला जायचं म्हणून हे या विमानातून चालले होते.

वैभवी एका कंपनीमध्ये उच्चपदस्थ होती. तर अशोक त्रिपाठी ओडिशाचे रहिवासी असून ते भुवनेश्वरमधल्या खासगी कंपनीत काम करत होते. अशोक आणि वैभवी यांनी प्रेमविवाह केला होता. यांचा मुलगा धनुष २२ वर्षांचा असून तो सध्या महाविद्यालयीन शिक्षण होता. तर मुलगी रितिका १८ वर्षांची होती. या दुर्घटनेदरम्यान, २२ मृतदेह हाती लागले आहेत. तसंच विमानातला ब्लॅक बॉक्सही सापडला आहे.