संजय गांधी निराधार योजनेतील २८ अर्ज मंजूर

अलिबाग, ता. १२ (बातमीदार) ः संजय गांधी योजना समिती अलिबागचे अध्यक्ष प्रकाश बाळाराम पाटील यांच्या अध्यक्षतेखाली सोमवारी अलिबाग तहसीलदार कार्यालयात बैठकीचे आयोजन करण्यात आले होते. सभेत २८ अर्ज मंजूर करण्यात आले. सभेस हेमनाथ खरसांबळे, उत्तम पाटील, सुनील पाटील, दक्षता राऊत, नीलिमा भगत हे अशासकीय सदस्य तसेच हरिश्चंद्र कुंडल व रुबिना भगत हे शासकीय सदस्य उपस्थित होते. नायब तहसीलदार मानसी पाटील यांनी संजय गांधी निराधार योजना, श्रावणबाळ राज्य निवृत्ती वेतन योजना, इंदिरा गांधी निराधार योजना, इत्यादी योजनांबाबत सविस्तर माहिती दिली.
अलिबाग तालुक्यात मार्च २०२२ अखेरपर्यंत संजय गांधी योजनेंतर्गत १ हजार १६३, श्रावणबाळ योजनेंतर्गत ८०१, इंदिरा गांधी वृद्धापकाळ योजनेंतर्गत ३३६ असे एकूण २ हजार ३०० लाभार्थी लाभ घेत असून लाभार्थ्यांना वर्षभरात एकूण २ कोटी ६२ लाख ७२ हजार इतके अनुदान वाटप करण्यात आले असल्याचे सांगण्यात आले.