मजरे जांभुळपाडा येथील तरुणाचा बुडून मृत्यू

पाली, ता. ३१ (वार्ताहर)ः सुधागड तालुक्यातील मजरे जांभूळपाडा येथील तरुणाचा शेतावरील विहिरीत बुडून मृत्यू झाल्याची घटना शुक्रवारी घडली. रवींद्र मालुसरे (२०) हा तरुण चरायला सोडलेली गुरे आणण्यासाठी शेतावर गेला होता. यावेळी विहिरीत पोहण्यासाठी उतरला असता पाण्याचा अंदाज न आल्‍याने २५ ते ३० फूट खोल पाण्यात बुडाला. गावकऱ्यांनी मृतदेह बाहेर काढण्याचा प्रयत्न केला, मात्र विहीर खोल असल्याने शक्य झाले नाही. घटनेची खबर मिळताच पाली पोलिस व कोलाड रिव्हर राफ्टिंगचे प्रमुख महेश सानप यांच्या पथकाने घटनास्थळी धाव घेतली. एक ते दीड तासांच्या प्रयत्‍नानंतर मृतदेह बाहेर काढण्यात यश मिळाले.