कष्टकऱ्यांच्या वाट्याला दूषित पाणी

कष्टकऱ्यांच्या वाट्याला दूषित पाणी

पाली, ता. १७ (वार्ताहर) ः रायगड जिल्हा आदिवासी बहुल आहे. येथील डोंगरदऱ्यात आदिवासी बांधवांचे वास्‍तव्‍य मोठ्या संख्‍येन असून रानमेवा, मासळी, लाकूडफाटा विकून, मोलमजुरी करून त्‍यांचा उदरनिर्वाह चालतो. त्‍यासाठी त्यांना रानोमाळ भटकावे लागते. तापमान वाढीबरोबरच पिण्याच्या पाण्याचे दुर्भिक्षामुळे सध्‍या आदिवासी बांधव पुरते हवालदिल झाले आहेत. रणरणत्या उन्हात तहान भागविण्यासाठी ओढे, नदी, नाले, तलावातील गढूळ पाणी नाइलाजाने प्यावे लागते. उन्हामुळे नैसर्गिक स्रोत आटल्‍याने गाळ, जीवजंतू व शेवाळ मिश्रित पाणी पिण्याची वेळ आदिवासींवर आली असून त्‍यामुळे आरोग्याचा प्रश्न निर्माण होण्याची शक्‍यता आहे.
माणगाव तालुक्यातील विळे येथील शिक्षक राम मुंडे पक्षी निरीक्षणासाठी दुर्गम भागात गेले होते, यावेळी तळ गाठलेल्‍या एका नदीत एक वयस्‍कर जोडपे मासे पकडताना दिसले. त्‍यांच्याजवळ दूषित पाणी भरलेली एक बाटली होती, याबाबत विचारणा केली असता पिण्याचे पाणी असल्‍याचे त्‍यांनी सांगितले. अशीच परिस्थिती इतरही आदिवासी वाड्यांची असल्‍याचे मुंडे यांनी सांगितले.
आदिवासी वाड्या-पाड्यात राहणाऱ्या ग्रामस्‍थांना उन्हाळ्यात पिण्याच्या पाण्यासाठी मैलोन् मेलाची पायपीट करावी लागते. शिवाय जे पाणी मिळते, तेही अतिशय खराब व दूषित असते. अनेक आदिवासी वाड्यांवर अद्याप कोणतीही नळपाणी योजना पोहोचलेली नाही. त्यामुळे रानावनात कामासाठी गेलेल्या आदिवासी बंधू-भगिनींना तेथे उपलब्ध असलेले खराब व दूषित पाणी प्यावे लागते. रोजच्या जेवणाची भ्रांत असलेल्या आदिवासींना विकतचे पाणी पिणे परवडणारे नाही, त्‍यामुळे प्रशासनाने ग्रामीण भागात प्राधान्याने नळपाणी योजना सुरू करावी, अशी मागणी जांभूळपाडा येथील आदिवासी समाजाचे नेते रमेश पवार यांनी केली आहे.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com