राज्य सीईटी सेलच्या आयुक्तपदी वनमाथी सी.

मुंबई ता. ५ ः राज्य सीईटी सेलच्या आयुक्तपदी वनमाथी सी. यांची नियुक्ती करण्यात आली. त्या २०१५ बॅचच्या आयएएस अधिकारी आहेत. धुळे जिल्हा परिषदेच्या मुख्य कार्यकारी अधिकारीपदावरून त्यांची बदली राज्य सीईटी सेलच्या आयुक्तपदी करण्यात आली आहे. पुढील दोन दिवसांत त्या आयुक्तपदाचा पदभार स्वीकारणार असल्याची माहिती सामान्य प्रशासन विभागाकडून देण्यात आली.
गेल्या महिन्यात सामान्य प्रशासन विभागाने के. व्ही. जाधव यांची सीईटी सेलच्या आयुक्तपदी नियुक्ती केली होती; मात्र काही कारणास्तव त्यांनी पदभार स्वीकारला नव्हता. त्यामुळे रवींद्र जगताप यांच्याकडे आयुक्तपदाचा पदभार देण्यात आला. त्यानंतर आता वनमाथी सी. यांची सीईटी सेलच्या आयुक्तपदी नियुक्ती करण्यात आली.