माजी संचालक जॉय थॉमस यांच्याविरोधात गुन्हा दाखल

मुंबई, ता. ५ : पीएमसी बॅंक घोटाळा प्रकरणी पोलिसांनी माजी व्यवस्थापकीय संचालक जॉय थॉमसवर आणखी एक फसवणुकीचा गुन्हा दाखल झाला आहे. थॉमस यांच्यासह बांधकाम व्यावसायिक लक्ष्मीचंद दामजी छेडा, हंसा छेडा यांच्याविरुद्ध कलम ४०६, ४०९, ४२०, १२० (ब) अंतर्गत गुन्हा दाखल केला असून या संदर्भात अधिक तपास सुरू असल्याची माहिती पोलिसांनी दिली.
थॉमस पीएमसी बँकेचे व्यवस्थापकीय संचालक असताना तारण असलेल्या कोट्यवधी रुपयांच्या सदनिकांवर नियमबाह्य पद्धतीने १११.५४ कोटी रुपयांचे कर्ज मंजूर करण्याचा आरोप त्यांच्यावर आहे. मे. सुद्रथ कन्स्ट्रक्शन प्रा. लि.चे संचालक लक्ष्मीचंद दामजी छेडा आणि हंसा छेडा यांना कर्ज दिले होते. छेडा यांनी कर्जासाठी बँकेत तारण ठेवलेली सदनिका यापूर्वीच बँकेकडे तारण ठेवली होती.