सांताक्रूझच्या एलआयसी कार्यालयाला आग

मुंबई, ता. ७ : सांताक्रूझ येथील आयुर्विमा महामंडळाच्या कार्यालयाला शनिवारी (ता. ७) सकाळच्या सुमारास भीषण आग लागली. अग्निशमन दलाच्या जवानांनी सहा तासांनंतर आगीवर नियंत्रण मिळवले. या घटनेत सुदैवाने कोणतीही जीवितहानी झाली नसली तरी कार्यालयातील अनेक महत्त्वाचे दस्तऐवज जळून खाक झाले.
सांताक्रूझच्या एसव्ही मार्गावरील भारतीय आयुर्विमा महामंडळाच्या (एलआयसी) इमारतीला सकाळी ६.४० च्या सुमारास आग लागली. याच इमारतीत एलआयसीचे वेतन बचत योजना (एसएसएस) विभागीय कार्यालय आहे. मुंबई अग्निदशमन दलाच्या जवानांनी अथक प्रयत्न करून सहा तासांत आग आटोक्यात आणून कूलिंग ऑपरेशन्स सुरू केले. घटनास्थळापासून जवळच एलआयसीचे डेटा सेंटर होते; मात्र ते सुरक्षित असल्याचे सांगण्यात आले, असे एलआयसीने म्हटले आहे.