संदीप देशपांडेंसह दोघांचा अटकपूर्व जामिनासाठी अर्ज

मुंबई, ता. ९ : पोलिसांना गुंगारा देऊन पळून गेलेले महाराष्ट्र नवनिर्माण सेनेचे नेते संदीप देशपांडे यांच्यासह दोघांनी आज मुंबई सत्र न्यायालयात अटकपूर्व जामिनासाठी अर्ज दाखल केला. मंगळवारी त्यावर तातडीने सुनावणी होण्याची शक्यता व्यक्त होत आहे.

मशिदीवरील भोंगे काढण्यासाठी मनसेचे अध्यक्ष राज ठाकरे यांनी आक्रमक भूमिका घेतली आहे. त्या पार्श्वभूमीवर कायदा आणि सुव्यवस्था राखण्यासाठी पोलिसांनी मनसे कार्यकर्त्यांची धरपकड सुरू केली आहे. मात्र, देशपांडे आणि संतोष धुरी यांना ताब्यात घेत असताना झालेल्या गोंधळात एका महिला पोलिस कर्मचाऱ्याला धक्का लागून ती जमिनीवर कोसळली होती. त्यासंबंधीचा व्हिडीओ व्हायरल झाल्यावर पोलिसांनी दोघांविरोधात शिवाजी पार्क पोलिस ठाण्यात चार दिवसांपूर्वी गुन्हा दाखल केला असून त्यांचा तपास सुरू आहे.