खंडणी उकळणाऱ्या बंटी-बबलीला बेड्या

सकाळ वृत्तसेवा
मुंबई, ता. ११ : मुंबईत बंदुकीच्या धाकाने खंडणी उकळणाऱ्या बंटी-बबलीला कांदिवली पोलिसांनी रंगेहात बेड्या ठोकल्या आहेत. हे जोडपे बंदूक घेऊन कांदिवली परिसरात येणार असल्याची माहिती कांदिवली पोलिसांना मिळाली होती. त्यानंतर पोलिसांनी सापळा रचून दोघांना अटक केली. चौकशीत जोडप्याने पिस्तुलाच्या जोरावर कांदिवली व परिसरात आपला धाक निर्माण करत खंडण्या गोळा करण्याचा कट रचल्याचे निष्पन्न झाले.

पोलिसांनी दिलेल्या माहितीनुसार, अटक करण्यात आलेल्या जोडप्यावर चारकोप, एमएचबी, मालवणी, मालाड आणि कांदिवली पोलिस ठाण्यात चोरी, चेन स्नॅचिंग, खंडणी व इतर अनेक गंभीर गुन्हे दाखल आहेत. आदम शेर महंमद खान उर्फ बंटी (२८) असे अटक करण्यात आलेल्या आरोपीचे नाव असून महिला आरोपीचे नाव श्वेता सूर्यकांत लाड उर्फ बबली (२४) असे आहे. बंटीविरुद्ध मुंबईतील विविध पोलिस ठाण्यांत १३ गुन्हे दाखल असून, त्याची प्रियसी असलेल्या बबली विरुद्ध तीन गुन्हे दाखल आहेत. बंटी अनेकदा तुरुंगातही गेला आहे, अशी माहिती पोलिसांनी दिली.