लैंगिक शोषणातील आरोपीची पुराव्याअभावी मुक्तता

मुंबई : सोळा वर्षीय अल्पवयीन मुलीचे लैंगिक शोषण केल्याचा आरोप असलेल्या युवकाला विशेष न्यायालयाने सबळ पुराव्याअभावी निर्दोष मुक्त केले आहे. तक्रारदार पीडित मुलीच्या बाळाचे आणि आरोपीचे डीएनए भिन्न असल्याचा वैद्यकीय अहवाल आहे, त्यामुळे मुलाने पीडितेचे शोषण केले नाही, असा युक्तिवाद आरोपीच्या वतीने करण्यात आला. न्यायालयाने हा युक्तिवाद मान्य केला.

मुलीने खोटी माहिती देऊन आरोपीला यामध्ये गोवल्याचा दावा आरोपीने केला होता. २०१७ मध्ये पीडित मुलगी गर्भवती असल्याचे तिच्या पालकांना आढळले. तेव्हा मुलीने आरोपीचे नाव घेऊन तीन वर्षे तो लैंगिक शोषण करत आहे, असा आरोप केला होता. या प्रकरणी शिवाजी पार्क पोलिस ठाण्यात गुन्हा दाखल करण्यात येऊन त्याआधारे आरोपीला अटक करण्यात आली होती.