जे. जे. कला संचालनालयात वादग्रस्त संचालकांची प्रभारीपदी निवड

जे. जे. कला संचालनालयात वादग्रस्त संचालकांची प्रभारीपदी निवड

मुंबई, ता. ७ : जे.जे. कला संचालनालयाच्या प्रभारीपदी राजीव मिश्रा यांच्या जागी अधिष्ठाता विश्वनाथ साबळे यांची प्रभारी संचालक म्हणून निवड करण्यात आली आहे. कोट्यवधी रुपयांचे विविध कामकाज तसेच प्रवेश प्रक्रिया, टेंडर पळवणे आदींसंदर्भात साबळे यांच्यावर अनेकदा आरोप झाले आहेत. त्यामुळे पुन्हा एकदा कला संचालनालयाला वादग्रस्त संचालक मिळाले असल्याची चर्चा कलाक्षेत्रातील वर्तुळात सुरू झाली आहे; तर दुसरीकडे कलेची जाण असणारा संचालक १६ वर्षाने मिळाला असल्याचे सांगत प्राध्यापक आणि संस्थाचालक संघटनांनी नव्या प्रभारी संचालकाचे स्वागत केले आहे.

राजीव मिश्रा यांचा कार्यकाळ वादग्रस्त ठरला होता. मिश्रांविरोधात अनेक तक्रारी आल्याने त्यांची तातडीने हकालपट्टी करून त्यांच्या ठिकाणी साबळे यांची प्रभारी संचालक म्हणून नियुक्ती करण्यात आली आहे. ९ जून रोजी साबळे यांचा भव्य सत्कार आयोजित करण्यात आल्याची माहिती उच्च व तंत्रशिक्षण मंत्री उदय सामंत यांनी ट्विट करून दिली आहे.

कोट..
-------------------------
मी जे. जे. कला महाविद्यालयात १० वर्षे अधिष्ठाता म्हणून खूप चांगले काम केले आहे. विद्यार्थ्यांसाठी अनेक चांगले उपक्रम राबवले आहेत. त्यामुळे माझ्या कार्यकाळात कुठल्याही वादग्रस्त अशा तक्रारी झालेल्या नाहीत. ज्या काही तक्रारी कोणाला वाटत असतील, त्याची मला माहिती नाही; परंतु मला जे चांगले करता आले, ते मी माझ्या कार्यकाळात करत आहे. प्रभारी संचालक म्हणून जबाबदारी मिळाल्याने तिथेही चांगले काम करण्याची संधी मिळाली आहे.
- विश्‍वनाथ साबळे, प्रभारी संचालक, जे. जे. कला संचालनालय