म्हाडाच्या बांधकाम साहित्य चाचणी शुल्कात वाढ

मुंबई, ता. १० : म्हाडाच्या दक्षता व गुणनियंत्रण विभागाने बांधकाम साहित्य चाचणी शुल्कात वाढ केली आहे. १० जूनपासून ही वाढ लागू झाली असल्याने म्हाडाच्या महसुलात काहीशी वाढ होणार आहे. या निर्णयामुळे खासगी विकासक आणि संस्थांनाही आता बांधकाम साहित्य चाचणीसाठी अधिकची रक्कम मोजावी लागेल.

महाराष्ट्र गृहनिर्माण व क्षेत्रविकास प्राधिकरणाच्या बांधकाम साहित्य चाचणी प्रयोगशाळेस इंटिग्रल सर्टिफिकेशन या मान्यताप्राप्त संस्थेतर्फे आयएसओ गुणवत्ता प्रमाणपत्र मिळाले आहे. म्हाडाच्या विविध मंडळांसह, सरकारी आणि खासगी संस्था बांधकाम साहित्याच्या चाचण्या म्हाडाच्या प्रयोगशाळेत करतात. यासाठी म्हाडा साहित्याच्या चाचणीनुसार विविध दर आकारते. यातून म्हाडाला उत्पन्नही मिळते. यापूर्वी म्हाडाने २०१७ मध्ये चाचणी शुल्कात वाढ केली होती. मात्र बांधकाम क्षेत्रात सर्व साहित्यांच्या दरात झालेली वाढ, कोरोनामुळे झालेली आर्थिक कोंडी अशा अनेक कारणांमुळे चाचणी शुल्कात वाढीचा निर्णय म्हाडाने घेतला आहे. म्हाडाच्या प्रयोगशाळेत सिमेंट, वीट, क्रशिंग मूल्य, चकचकीत फरशा, क्रॉंकीट, लोखंडी सळई, लाकडे आदी साहित्याची चाचणी होते. या तपासणी शुल्कात वाढ केल्याची माहिती म्हाडाने जाहीर केली.