पहिली ते चौथीपर्यंतच्या नवीन अभ्यासक्रमासाठी समिती स्थापन होणार | Sakal
sakal

बोलून बातमी शोधा

पहिली ते चौथीपर्यंतच्या नवीन अभ्यासक्रमासाठी समिती स्थापन होणार
पहिली ते चौथीपर्यंतच्या नवीन अभ्यासक्रमासाठी समिती स्थापन होणार

पहिली ते चौथीपर्यंतच्या नवीन अभ्यासक्रमासाठी समिती स्थापन होणार

sakal_logo
By

मुंबई, ता. २५ : राज्यात लवकरच नवीन शैक्षणिक धोरणाची अंमलबजावणी होणार आहे. त्या पार्श्वभूमीवर अभ्यासक्रम आणि त्याच्या रचनांमध्ये बदल केले जाणार आहेत. त्याचाच भाग म्हणून पहिली ते चौथीपर्यंतच्या विद्यार्थ्यांवर अभ्यासाचे ओझे न लादता, त्यांच्या मेंदूचा विकास होण्याकरिता त्याचा गृहपाठ बंद केला जाणार आहे. त्यासाठी नवीन अभ्यासक्रम तयार करण्यासाठी समिती स्थापन केली जाणार असल्याची माहिती शालेय शिक्षण मंत्री दीपक केसरकर यांनी दिली.

पहिली ते चौथीपर्यंत विद्यार्थ्यांचे गृहपाठ बंद करण्याची घोषणा शालेय शिक्षण मंत्री दीपक केसरकर यांनी १६ सप्टेंबर २०२२ रोजी केली होती. त्यानंतर शिक्षण विभागाकडे अनेक संस्थांनी या अभ्यासक्रमासाठी शिफारशी केल्या आहेत. त्यांच्या शिफारशी लक्षात घेतल्या जाणार आहेत. सोबत राज्यातील विविध शिक्षक संघटना, संस्थाचालक, शिक्षणतज्ज्ञ यांच्याशी चर्चा केली जाणार आहे. त्यासाठी शालेय शिक्षण विभागामार्फत बैठका घेऊन अंतिम निर्णय घेण्यात येणार असल्याचे सांगण्यात आले.

गृहपाठ बंद झाल्यास मोठ्या प्रमाणात शिक्षक, शाळा हे विविध माध्यमांतून चुकीचा अर्थ काढतील, अथवा त्यातून पळवाटा काढतील, यासाठी त्यात खबरदारी घेतली जाणार आहे. नवीन अभ्यासक्रम आणि सध्याचा अभ्यासक्रम हा विद्यार्थ्यांना पटकन आणि योग्य समजेल, अशा पद्धतीने शिक्षकांनी शिकवण्याची आवश्यकता आहे. तशा पद्धतीने शिकवल्यास विद्यार्थ्यांना गृहपाठाची गरज भासणार नसल्याचे शिक्षण मंत्र्यांनी यापूर्वीच स्पष्ट केले होते.

शैक्षणिक गुणवत्ता वाढवण्याचा प्रयत्न
नवीन शैक्षणिक धोरणातील तरतुदी आणि ‘परख’ या संस्थेने केलेल्या शिफारशी, त्यांनी केलेल्या मार्गदर्शक सूचनांचा विचार करण्यात येणार आहे. त्यासाठी नवीन अभ्यासक्रम तयार करण्यासाठी तज्ज्ञांची समिती स्थापन केली जाणार आहे. विद्यार्थीहित व शैक्षणिक गुणवत्ता वाढीच्या दृष्टीने यासाठी सर्व निर्णय घेतले जाणार असल्याचे केसरकर यांनी सांगितले.