व्यसनांपासून दूर राहा ः कृष्णा यादव

मुंबई, ता. २३ : व्यसन हा कॅन्सरपेक्षाही मोठा गंभीर आजार आहे. ते एक प्रकारचे विनाशकारी वादळ असते. आज युवा पिढी मोठ्या प्रमाणात या व्यसनाच्या वादळात अडकून पडली आहे. त्यामुळे या विनाशकारी वादळाला रोखण्यासाठी तरुण पिढीने व्यसनापासून दूर राहावे, असे आवाहन जीवनरेखा प्रतिष्ठानचे प्रमुख व युथ आयकॉन कृष्णा यादव यांनी केले.
यिनच्या अधिवेशनात सेवा या विषयावर यादव यांनी आपले विचार मांडले. या वेळी त्यांनी आपण करत असलेल्या व्यसनमुक्तीच्या सेवाकार्याची सविस्तर माहिती दिली. आपल्या वडिलांनी सुरू केलेल्या कामाचा वसा आपण कसा जतन करत आहोत, याची अनेक उदाहरणे देत त्यांनी अनेक अनुभव सांगितले.
यादव म्हणाले की, व्यसनमुक्ती आणि त्यासंदर्भातील कार्य मी शालेय जीवनातच पाहिले होते. माझ्या वडिलांनी अत्यंत हलाखीच्या परिस्थितीमध्ये संस्था सुरू केली होती. लातूरमध्ये अगदी भूतबंगला म्हणून ओळखल्या जाणाऱ्या एका पडक्या इमारतीत ती सुरू केली होती. मात्र आज या संस्थेने ३० हजारांहून अधिक जणांना व्यसनापासून दूर करत त्यांच्यावर उपचार केले आहेत. त्याचा खूप मोठा आनंद आम्हाला वाटतो. जीवनरेखा प्रतिष्ठानच्या माध्यमातून व्यसनमुक्ती केंद्राची मोहीम चालवली जाते. त्या माध्यमातून व्यसनाच्या आहारी गेलेल्या लोकांना त्यापासून दूर करण्यासाठी उपचार केले जातात. यिनच्या प्रतिनिधींनी यादव यांना अनेक प्रश्न विचारून याविषयीची अधिकची माहिती जाणून घेतली.