राज्‍यभरात उष्‍माघातामध्ये वाढ

राज्‍यभरात उष्‍माघातामध्ये वाढ

सकाळ वृत्तसेवा
मुंबई, ता. १७ : उन्हाच्या झळांमुळे संपर्ण राज्‍यातील नागरिक त्रस्‍त झाले आहेत. अनेक भागांमध्ये पारा ४२ अंशाच्या पुढे गेला आहे. यामुळे उष्‍माघाताचे प्रमाणही वाढल्‍याचे शासनाच्या आकडेवारीतून दिसून येत आहे. जानेवारी ते आतापर्यंत राज्‍यभरात १२ जणांचा मृत्यू झाला आहे; तर २,२५३ रुग्ण आढळले असल्‍याची माहिती आरोग्य विभागाकडून मिळाली आहे.
अनेक ठिकाणी दुपारी तापमान चाळिशी गाठत आहे. घामाच्या धारांमुळे अंगाची लाही-लाही होते. लहान मुले, ज्येष्ठ नागरिक, आजारी व्यक्‍तींना याचा सर्वाधिक त्रास सहन करावा लागत आहे. वाढत्‍या उन्हापासून स्‍वतःचे रक्षण करण्यासाठी नागरिकांनी विशेष दक्षता घेण्याचे आवाहन प्रशासनाकडून करण्यात येत आहे. बदललेली जीवनशैली, घरांची रचना, आधुनिक बांधकाम, वृक्षतोडीमुळे उष्णतेचा प्रकोप कायम राहणार असल्याने यावर दिलासा मिळण्यासाठी प्रशासनाकडूनही काही उपाययोजना करण्यात येत आहेत.

प्रशासकीय स्‍तरावर प्रयत्‍न
गेल्या काही वर्षांत जगभरातील तापमानात बदल जाणवू लागला आहे. उष्माघाताचे आजार वाढले आहे. उष्माघात हा एक प्रकारे गंभीर आजार आहे. शरिराचे तापमान ४० अंश सेल्सिअसपेक्षा अधिक वाढले, तर ते सूर्याच्या गरमीपुढे सामान्य पातळी ठेवणे अशक्य होते. त्यामुळे रुग्णाचा मृत्यू झाल्याचे समोर येते. त्यामुळे राज्यात उष्णता विकार प्रतिबंध व नियंत्रणासाठी विविध पातळीवर दरवर्षी १ मार्च ते ३१ जुलै या कालावधीत उपाययोजना करण्यासाठी आराखडा तयार करण्यात येतो.

हे करा
* पुरेसे पाणी प्या. प्रवासात पाणी सोबत ठेवा.
* हलक्या वजनाचे फिकट रंगाचे सैलसर कपडे वापरा. उन्हात गॉगल, छत्री, पादत्राणे वापरा.
* उन्हात जाताना टोपीखाली ओलसर कपडा ठेवा.
* पाळीव प्राण्यांना सावलीत थंड ठिकाणी ठेवा.
* ओलसर पडदे, पंखा, कुलर यांच्या मदतीने घर थंड ठेवा.
---
करू नका
* शक्यतो उन्हाच्या वेळेत घराबाहेर जाणे टाळा.
* कष्टाची कामे उन्हात करू नका.
* पार्क केलेल्या वाहनात लहान मुलांना ठेवू नका.
* गडद रंगाचे तंग कपडे वापरू नका.
* उन्हाच्या काळात स्वयंपाक करणे टाळा. स्वयंपाक घर हवेशीर ठेवा.
* मद्य, चहा, कॉफी टाळा.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com