फटाक्यांचा आवाज नियंत्रणात :

फटाक्यांचा आवाज नियंत्रणातच

एमपीसीबीकडून फटाक्यांची चाचणी

सकाळ वृत्तसेवा
मुंबई, ता. ३१ : दिवाळी पर्वाच्या निमित्ताने महाराष्ट्र प्रदूषण नियंत्रण मंडळाने फटाक्यांच्या आवाजाची मर्यादा तपासण्यासाठी नुकतीच फटाक्यांची चाचणी घेतली. मंडळाच्या या चाचणीत फटाक्यांचा आवाज नियंत्रणात असल्याचे निष्कर्ष काढण्यात आला आहे. चाचणी घेतलेले सर्व फटाके प्रथमच परवानगी मर्यादेत असल्याचे समोर आले आहे. आवाज फाऊंडेशन या सामाजिक संस्थेच्या सहयोगाने ही तपासणी करण्यात आली आहे. राष्ट्रीय केमिकल्स अॅण्ड फर्टिलायझर्स या माहुल चेंबूर येथील क्रीडांगणावर दरवर्षीप्रमाणे ही तपासणी करण्यात आली.

दिवाळीच्या पार्श्वभूमीवर दरवर्षी बाजारातील फटाक्यांची चाचणी केली जाते. गेल्या वर्षी ही चाचणी झाली नव्‍हती. यंदा न्यायालयाच्या दणक्यामुळे प्रदूषण मंडळाने दिवाळीपूर्वी फटाक्यांची तपासणी केली. यात ३० प्रकारचे फटाके तपासण्यात आले. यात मोठे आवाज कऱणारे फटाके घेण्यात आले होते. यात चाचणीत सर्व फटाक्यांचा आवाज हे १०० डेसिबलच्या आत असल्याचे स्पष्ट झाले. ६६ ते ९५ डेसिबलच्या दरम्यान हे सर्व आवाज रेकॉर्ड झाले.
.....
संयुक्तपणे चाचणी!
आम्ही आवाज फाऊंडेशनच्या प्रमुख सुमेरा अब्दुल्लली यांनी सांगितले की, प्रदूषण मंडळासोबत चाचणी करण्यात येत असून १५ वर्षांत फटाक्यांची ध्वनी पातळी लक्षणीय कमी झाली आहे. या वर्षी संयुक्तपणे केलेल्या चाचणीत सर्व फटाके प्रथमच परवानगी मर्यादेत असल्याचे आढळले. आवाज फाउंडेशनने प्रयोगशाळेत चाचणी करून रासायनिक विश्लेषण केले.
....................................