कुलाबा मतदारसंघात १० लाख डॉलर पकडले

कुलाबा मतदारसंघात १० लाख डॉलर पकडले

मुंबई, ता. ३१ ः कुलाबा मतदारसंघातील निवडणूक आयोगाच्या स्थिर सर्व्हेक्षण पथकाने (एसएसटी) गुरुवारी (ता. ३१) संध्याकाळी सहाच्या सुमारास विविध देशांचे सुमारे १० लाख डॉलर वाहून नेणारे वाहन पकडले. त्यामुळे मतदारसंघात उलटसुलट चर्चांना उधाण आले. चौकशीअंती हे परकीय चलन बॉम्बे मर्कंटाईल बँकेचे असल्याची माहिती पुढे आली. खातरजमा करण्यासाठी पथकाने ही रोकड कस्टम विभागाच्या ताब्यात दिली आहे. उपजिल्हाधिकारी तथा मतदारसंघाचे निवडणूक निर्णय अधिकारी महादेव किरवले यांनी दिलेल्या माहितीनुसार, वाहनात अमेरिका, सिंगापूर, मलेशियासह अन्य देशांचे चलन होते. चौकशी केली असता ही रोकड बॉम्बे मर्कंटाईल बँकेची असून ती विमानतळावरून बँकेकडे वाहून नेली जात होती, अशी माहिती पुढे आली. बँक कर्मचाऱ्यांनी या व्यवहाराशी संबंधित कागदपत्रे दाखवली. अशा व्यवहारांना कस्टम विभागाची परवानगी आवश्यक असते. त्यामुळे खातरजमा करण्यासाठी वाहन आणि त्यातील डॉलर कस्टम विभागाच्या ताब्यात देण्यात आले.