शालेय शुल्काच्या हिशोबात हेराफेरी

मुंबई, ता. २० ः वांद्रे येथील एका शाळेतील विद्यार्थ्यांनी गेल्या दोन वर्षांत भरलेले तब्बल २९ लाखांचे शुल्क कारकून महिलेने स्वतःच्या खात्यावर घेत संस्थेची फसवणूक केल्याचे धक्कादायक प्रकरण समोर आले आहे. याप्रकरणी खार पोलिस ठाण्यात महिलेविरोधात गुन्हा नोंदवत पुढील प्रक्रिया सुरू आहे.
दीपिका गाला असे आरोपी कारकून महिलेचे नाव आहे. त्यांच्यावर कार्यालयीन कामकाज आणि विद्यार्थ्यांकडून गोळा केलेले शुल्क शाळेच्या बँक खात्यावर जमा करण्याची जबाबदारी होती. संबंधित शिक्षण संस्थेच्या अध्यक्षाने दिलेल्या तक्रारीनुसार शाळेत एकूण १८५ विद्यार्थी शिक्षण घेतात. त्यांच्याकडून गोळा होणाऱ्या शुल्क रकमेतून शिक्षक आणि शिक्षकेतर कर्मचाऱ्यांचे पगार काढले जातात, मात्र जानेवारीत शाळेच्या बँक खात्यावर अपेक्षित रक्कम जमा नसल्याने मुदत ठेव मोडून पगार देण्यात आले. त्यानंतर विद्यार्थ्यांनी भरलेले शालेय शुल्क आणि बँकेत जमा रक्कम पडताळणीत तब्बल २९ लाखांची तफावत आढळली. याबाबत गाला यांच्याकडे चौकशी केली असता त्यांनी समाधानकारक उत्तरे दिली नाहीत, मात्र शालेय शुल्क शाळेच्या खात्यावर वळती केले नसल्याचे निदर्शनास आले.