धोकादायक इमारतीमधील रहिवाशांना भाडे

सकाळ वृत्तसेवा
मुंबई, ता. २० : पावसाळ्याच्या पार्श्वभूमीवर म्हाडाने संरचना परीक्षणात ९६ इमारती अतिधोकादायक असल्याचे स्पष्ट झाले आहे. या इमारतींमध्ये जवळपास २,४०० कुटुंबे वास्तव्यास आहेत, पण रहिवाशांच्या निवासासाठी पर्यायी व्यवस्था नसल्याने सदनिका रिकामी केल्यास २० हजार रुपये भाडे देण्याचा निर्णय म्हाडाने घेतला आहे.
म्हाडाच्या स्ट्रक्चरल ऑडिटमध्ये अतिधोकादायक ९६ इमारतींत २४०० रहिवासी वास्तव्यास आहेत. या इमारतींतील रहिवाशांना पर्यायी निवास व्यवस्था म्हणून देण्यासाठी पुरेशा संक्रमण सदनिका उपलब्ध नाहीत. त्यामुळे अतिधोकादायक इमारतींमधील रहिवाशांना नियमानुसार भाडे दिले जाणार आहे. त्यासाठी संबंधितांना म्हाडाच्या वॉर्ड कार्यालयात घराचे पुरावे द्यावे लागणार आहेत. तसेच कागदपत्रे तपासणीनंतर पात्र ठरणाऱ्या रहिवाशांना दर महिन्याला भाडे दिले जाणार आहे. त्यामुळे रहिवाशांनी आपल्या घराचे पुरावे म्हाडाला सादर करावे, असे म्हाडाने स्पष्ट केले आहे.
-----------------------------------
२०२५ पूर्वीच्या रहिवाशांना भाडे नाही
संक्रमण सदनिका उपलब्ध नसल्याने पर्यायी निवासाची व्यवस्था करणाऱ्या भाडेकरू-रहिवाशांना भाडे देणार आहे, मात्र २०२५ च्या आधी ज्या रहिवाशांनी संक्रमण शिबिरात जाण्याऐवजी स्वतःची पर्यायी निवास व्यवस्था केली आहे. तेव्हा संक्रमण सदनिका असूनही त्यांनी घेण्यास नकार दिला होता. त्यामुळे त्यांना भाडे मिळणार नाही.
----------------------------------
काय पुरावे द्यावे लागणार
- सदनिका भाड्याने घेतल्याचा भाडेकरार.
- भाडेपावती.
- रहिवासी पुरावा.
- वीजदेयके.
- मतदान ओळखपत्र.