‘विदेशी’ महागल्याने ‘देशी’ला उत

‘विदेशी’ महागल्याने ‘देशी’ला ऊत
राज्यभरात मद्यविक्रीत तब्बल सात टक्के वाढ
नितीन बिनेकर ः सकाळ वृत्तसेवा
मुंबई, ता. २० : राज्य सरकारने उत्पादन शुल्कात भरमसाठ वाढ केल्यामुळे विदेशी मद्याच्या किमती मोठ्या प्रमाणात वाढल्या आहेत. त्यामुळे तळीरामांनी देशी दारूकडे मोर्चा वळविला आहे. परिणामी मागील वर्षाच्या तुलनेत यंदा राज्यात देशी दारूच्या विक्रीत तब्बल सात टक्क्यांची वाढ नोंदवण्यात आली आहे.
विदेशी दारूच्या दरांमध्ये मागील काही दिवसांत वाढ झाली आहे. दुसरीकडे देशी दारू हा तुलनेने स्वस्त व सहज उपलब्ध होणारा पर्याय असल्याने ग्राहकांचा कल हळूहळू तिकडे वळला आहे. राज्य उत्पादन विभागाच्या अधिकृत आकडेवारीनुसार, राज्यात एप्रिल ते जून २०२५ या कालावधीत एकूण १०६९.८३ लाख लिटर देशी दारूची विक्री झाली. मागील वर्षी याच कालावधीत ही विक्री १०००.०१ लाख लिटर इतकी होती. म्हणजेच एका वर्षात देशी दारूच्या विक्रीत सुमारे ६९.८२ लाख लिटरने वाढ झाली. आतापर्यंत केवळ विदेशी मद्य खरेदी करणारे ग्राहकही देशी दारूची मागणी करीत आहेत. काही देशी ब्रँडच्या दारूच्या गुणवत्तेतही सुधारणा झाल्याचे ठाणे येथील एका दारू विक्रेत्याने सांगितले.
-----
कोकणात किरकोळ घट
राज्यभरात देशी मद्यविक्री वाढत असली तरी कोकणातील काही जिल्ह्यांमध्ये सौम्य घसरण नोंदवण्यात आली आहे. पर्यटन हंगाम संपल्यानंतर या भागातील मद्यविक्री कमी होते, असे विक्रेत्यांचे म्हणणे आहे. शिवाय स्थानिक लोकसंख्याही तुलनेने कमी आहे.
---
देशी दारूची मागणी वाढणार
विदेशी दारूच्या वाढत्या दराचे सावट लवकर हटण्याची शक्यता कमी असल्याने आगामी काळात देशी मद्याच्या मागणीत आणखी वाढ होण्याची शक्यता वर्तविली जात आहे. बाजारपेठेत विविध नवीन देशी ब्रँड्सही दाखल होत असून, ‘परवडणारा पर्याय’ म्हणून देशी दारूचा स्वीकार वाढत असल्याचे संकेत या आकडेवारीतून स्पष्ट दिसत आहेत.
---
महसुलाच्या दृष्टीने सकारात्मक
ग्राहकांचा कल सध्या देशी ब्रँडकडे वळलेला आहे. विदेशी दारूची मागणी काही प्रमाणात स्थिरावली आहे. ही बाब महसुलासाठी चांगली असल्याची माहिती राज्य उत्पादन शुल्क विभागाच्या एका वरिष्ठ अधिकाऱ्यांनी दिली.
---
वर्षभरातील वाढ
१०६९.८३ लाख लिटर
एप्रिल ते जून २०२५
---
१०००.०१ लाख लिटर
एप्रिल ते जून २०२४
---
६.९८ टक्के
दारूविक्रीतील वाढ
---
दारूविक्री वाढलेले जिल्हे
नंदुरबार ३५.६१ टक्के
सोलापूर ३३.७५ टक्के
रायगड १३.८३ टक्के
पालघर १२.२६ टक्के
भंडारा ११.९३ टक्के
वाशिम १०.६५ टक्के
---
दारूविक्री घटलेले जिल्हे
सिंधुदुर्ग - २.७४%
रत्नागिरी - २.४४%
कोल्हापूर -१.७६%
बीड -०.६५%