मुंबईकरांचे आरोग्यमान उंचावण्याचे प्रयत्न!

मुंबईकरांचे आरोग्यमान उंचावण्याचे प्रयत्न!
मंडई, दवाखान्याचे उपमुख्यमंत्र्यांच्या हस्ते भूमिपूजन
सकाळ वृत्तसेवा
मुंबई, ता. २० : मुंबईला जागतिक दर्जाचे शहर करण्यासाठी आवश्यक नागरी सुविधा उपलब्ध करण्याचे काम महापालिका करीत आहे. मुंबईकरांचे आरोग्यमान उंचावण्यासाठी पालिका प्रयत्नशील आहे, असे प्रतिपादन उपमुख्यमंत्री एकनाथ शिंदे यांनी केले. मरोळ येथील महापालिकेच्या मंडई व दवाखान्याच्या इमारतीचे भूमिपूजन शिंदे यांच्या हस्ते पार पडले. त्या वेळी ते बोलत होते.
मरोळ मंडईच्या पुनर्विकासात सुमारे ३,१८५ चौरस मीटर क्षेत्रावर तळमजला व पाच मजली इमारत उभारली जाणार आहे. यामध्ये सध्याच्या ९४ परवानाधारक विक्रेत्यांचे पुनर्वसन, प्रकल्प बाधितांचे स्थलांतर, बाजार सभागृह, शाकाहारी-मांसाहारी गाळ्यांची विभागणी, लिफ्ट, वाहनतळ, गोदाम, शीतगृह, दिव्यांगांसाठी सुविधा, प्रसाधनगृह अशा अद्ययावत सोयी असतील. दोन वर्षांत हा प्रकल्प पूर्ण करण्याचे पालिकेचे उद्दिष्ट आहे. तसेच मरोळ दवाखान्याची तळमजला अधिक पाच मजली नवी इमारत उभारली जाणार असून, यामध्ये डॉट रूम, लसीकरण कक्ष, ‘आपला दवाखाना’, हेल्थ पोस्ट आणि पीपीपी तत्त्वावर डायलिसिस केंद्र उभारण्यात येणार आहे. सद्यस्थितीत ही इमारत धोकादायक घोषित झाल्याने मंगला नर्सिंग होम येथे तात्पुरती सेवा सुरू आहे.