‘रॅपिडो’च्या संचालकाविरुद्ध गुन्हा

‘रॅपिडो’च्या संचालकाविरुद्ध गुन्हा
सकाळ वृत्तसेवा 
मुंबई, ता. २० : बंदी असूनही मुंबईत ॲपद्वारे बेकायदा बाइक टॅक्सी सेवा सुरू ठेवल्याप्रकरणी रॅपिडो कंपनी आणि तिच्या संचालकाविरुद्ध गुन्हा दाखल करण्यात आला आहे. याप्रकरणी अंबोली पोलिस ठाण्यात प्रादेशिक परिवहन आयुक्त कार्यालयातील वाहन निरीक्षक हर्षल सासे यांनी अंबोली पोलिस ठाण्यात तक्रार दिली आहे.
रॅपिडोच्या बाइक टॅक्सी ॲपद्वारे शहरात बेकायदा वाहतूक सेवा सुरू आहे. यासाठी शासनाची परवानगी घेतली नसल्याने ही प्रवाशांची फसवणूक असल्याचे तक्रारीत म्हटले आहे. पोलिसांनी मोटार वाहन कायद्याच्या विविध कलमांबरोबरच भारतीय न्याय संहितेमधील कलम ३१८(४) (फसवणूक) आणि कलम २२३ (लोकसेवकाने निर्गमित केलेल्या आदेशाचे उल्लंघन)नुसार गुन्हा नोंदवला आहे.
रॅपिडो कंपनीने रॉपेन ट्रान्सपोर्टेशन सर्व्हिसेस प्रायव्हेट लिमिटेड या नावाने परवानगीसाठी अर्ज केला होता. २० डिसेंबर २०२२ रोजी सरकारने तो अर्ज फेटाळून लावला. त्यानंतर रॅपिडोने उच्च न्यायालयात याचिका दाखल केली; मात्र ती फेटाळण्यात आली. त्यानंतर सर्वोच्च न्यायालयातही त्यांना दिलासा मिळाला नसला तरीही वाहतूक सेवा सुरूच ठेवली. याबाबत परिवहन आयुक्त कार्यालयाने कंपनीला नोटीसही बजावली होती.
===