एमएमएस, एमसीए प्रवेशपरीक्षेला मुदतवाढ

एमएमएस, एमसीए प्रवेश परीक्षेला मुदतवाढ
मुंबई, ता. २० : मुंबई विद्यापीठाच्या दूरस्थ व ऑनलाइन शिक्षण केंद्रामार्फत (सीडीओई) चालविण्यात येत असलेल्या एमएमएस (मास्टर ऑफ मॅनेजमेंट स्टडीज्) आणि एमसीए (मास्टर ऑफ कॉम्प्युटर ॲप्लिकेशन) या दोनवर्षीय अभ्यासक्रमांच्या ऑनलाइन प्रवेश परीक्षेसाठी अर्ज सादर करण्यास मुदतवाढ देण्यात आली आहे. या प्रवेश परीक्षांसाठी विद्यार्थ्यांना आता ३१ जुलैपर्यंत ऑनलाइन पद्धतीने अर्ज सादर करता येतील. सुधारित तारखांनुसार विद्यार्थ्यांच्या सरावासाठी २ ऑगस्ट रोजी चाचणी आयोजित केली जाणार असून, ३ ऑगस्टला ऑनलाइन परीक्षा घेतली जाणार आहे. एमएमएस (मास्टर ऑफ मॅनेजमेंट स्टडीज्) आणि एमसीए (मास्टर ऑफ कॉम्प्युटर ॲप्लिकेशन) हे दोन्ही अभ्यासक्रम यूजीसी आणि एआयसीटी मान्यताप्राप्त आहेत. विद्यार्थ्यांनी वेळेत ऑनलाइन अर्ज सादर करण्याचे आवाहन दूरस्थ व ऑनलाइन शिक्षण केंद्राचे संचालक प्रा. शिवाजी सरगर यांनी केले आहे.