शिवडी येथील कारखान्यातून ४० तोळे सोन्याची लूट

शिवडी येथील कारखान्यातून ४० तोळे सोन्याची लूट

मुंबई, ता. २४ : पार्सल देण्याच्या बहाण्याने तिघांनी शिवडी येथील सोन्याचे दागिने घडविणाऱ्या कारखान्यातून ४० तोळे सोने लुटले. हा गुन्हा करताना चोरट्यांनी कंपनीच्या सुरक्षा रक्षकावर चाकूचे वार केले. ही घटना मंगळवारी (ता. २१) मध्यरात्री घडली. याप्रकरणी रफी अहमद किडवई मार्ग पोलिसांनी गुन्हा नोंदवून तपास सुरू केला आहे. शिवडीतील बुसा इंडस्ट्रीज इस्टेटमध्ये प्रदीप शर्मा यांचा सोन्याचे दागिने घडवण्याचा कारखाना आहे. २१ ऑक्टोबर रोजी लक्ष्मीपूजन असल्याने कंपनीत पूजा करून ते घरी निघून गेले. रात्री १०च्या सुमारास कंपनीचा सुरक्षा रक्षक रोहितकुमार शर्मा एकटाच असताना मुख्य प्रवेशद्वारावर थाप पडली. आपले पार्सल आले आहे, असे ही व्यक्ती ओरडून सांगत होती. रोहितकुमारने दरवाजा उघडला तेव्हा एकामागोमाग एक तीन व्यक्ती आत शिरल्या. त्यांनी रोहितकुमारला धमकावले. तिघांपैकी एकाने त्याच्या पायावर चाकूने वार केला. अन्य दोघांनी कारखान्यातील कार्यालयात जाऊन हाती मिळतील तितके सोन्याचे दागिने घेऊन पोबारा केल्याचे पोलिसांनी सांगितले.