भंगार विक्रीतून पश्चिम रेल्वे मालामाल

भंगार विक्रीतून पश्चिम रेल्वे मालामाल
मुंबई ः ‘शून्य भंगार मोहिमे’अंतर्गत पश्चिम रेल्वेने विक्रमी कामगिरी केली आहे. एप्रिल ते ऑक्टोबर २०२५ या कालावधीत रेल्वेने भंगार विक्रीतून तब्बल ३०२ कोटी रुपयांहून अधिक महसूल मिळवला आहे. पश्चिम रेल्वेचे मुख्य जनसंपर्क अधिकारी विनीत अभिषेक यांनी दिलेल्या माहितीनुसार, ही कामगिरी रेल्वे बोर्डाने निर्धारित केलेल्या लक्ष्यापेक्षा सुमारे २१ टक्के जास्त आहे. विशेष म्हणजे, हे उद्दिष्ट गेल्या वर्षाच्या तुलनेत दोन आठवडे आधी साध्य करण्यात आले आहे. गेल्या वर्षी १३ नोव्हेंबर २०२४ रोजी पश्चिम रेल्वेने ३०० कोटी रुपयांचा आकडा पार केला होता. ‘शून्य भंगार’ या मोहिमेअंतर्गत प्रत्येक विभाग, कार्यशाळा आणि शेड भंगारमुक्त ठेवण्यावर रेल्वे प्रशासनाने भर दिला आहे. या उपक्रमामुळे केवळ उत्पन्नवाढच नव्हे, तर संसाधनांचा कार्यक्षम वापर आणि स्वच्छ कार्यपरिसर निर्माण करण्यासही मदत झाली आहे.
या यशासह पश्चिम रेल्वेने दक्षिण मध्य रेल्वेसोबत ‘३०० कोटी क्लब’मध्ये प्रवेश केला आहे.