पारा घसरला; गारठा वाढला

पारा घसरला; गारठा वाढला
मुंबई, ता. १२ : मुंबईत हिवाळ्याची चाहूल लागली असून, सांताक्रूझमध्ये बुधवारी किमान तापमान १८.६ अंश सेल्सिअस नोंदवण्यात आले. गेल्या काही दिवसांतील हे सर्वात कमी तापमान ठरले असून, मुंबईकरांना सकाळी गारवा जाणवत आहे. कुलाबा वेधशाळेत किमान तापमान २२.४ अंश सेल्सिअस, तर आर्द्रता ७४ टक्के नोंदवली गेली.
हवामान विभागाच्या माहितीनुसार, राज्यात पुढील चार ते पाच दिवस किमान तापमानात कोणताही मोठा बदल होणार नाही. उत्तर महाराष्ट्रातील नाशिक, धुळे, जळगाव आणि अहमदनगर या जिल्ह्यांमध्ये तापमान १० ते १३ अंश सेल्सिअसदरम्यान राहण्याचा अंदाज वर्तविण्यात आला आहे. दरम्यान, मुंबईसह कोकण किनारपट्टीवर हळूहळू थंडी वाढत असून, सकाळी व रात्री थंडावा अधिक जाणवेल, असा इशारा हवामान खात्याने दिला आहे.