‘शाळा बंद’मध्ये सहभागी शिक्षकांवर होणार कारवाई

‘शाळा बंद’मध्ये सहभागी शिक्षकांवर होणार कारवाई

९६,८०० जण गैरहजर राहिल्याचे उघड

मुंबई, ता. ६ : राज्यातील अनुदानित शाळांतील शिक्षकांनी ५ डिसेंबरला राज्यव्यापी पुकारलेल्या शाळा बंद आंदोलनात सहभागी झालेल्या प्राथमिकच्या २१ हजार ४७७ आणि माध्यमिक शाळेतील दोन हजार ५३९ शाळांतील एकूण ९६ हजार ८०० शिक्षकांवर शालेय शिक्षण विभागाकडून एक दिवसाचे वेतन कापण्याची कारवाई केली जाणार आहे. ही कारवाई शालेय शिक्षण विभागाच्या शिक्षण निरीक्षक आणि शिक्षणाधिकारी कार्यालय स्तरावरून केली जाणार आहे. प्राथमिक शिक्षकांत सर्वाधिक दाेन हजार ९२५ शिक्षक नाशिक जिल्ह्यात, तर त्याखालोखाल पुणे जिल्ह्यात दाेन हजार ३४८ गैरहजर हाेते, असे अहवालात म्हटले आहे.

शालेय शिक्षण विभागाने काढलेला १५ मार्च २०२४चा शासन निर्णय रद्द करावा आणि शिक्षकांसाठी टीईटी अनिवार्य केली जाऊ नये, या प्रमुख मागण्यांसाठी राज्यातील विविध शिक्षक, मुख्याध्यापक संघटनांकडून ५ डिसेंबरला राज्यव्यापी शाळा बंद आंदोलन करण्यात आले. या आंदोलनात किती शिक्षक सहभागी झाले आणि किती शाळा बंद ठेवण्यात आल्या होत्या, यासंदर्भातील अहवाल तयार केला आहे. यात माध्यमिकच्या २६ हजार ४९० शाळांपैकी केवळ दाेन हजार ५३९ शाळा बंद राहिल्या, तर या शाळांतील दाेन लाख २४ हजार ३६६ शिक्षक आणि शिक्षकेतर कर्मचाऱ्यांपैकी केवळ १३ हजार २१६ शिक्षकांनी शाळा बंदमध्ये सहभाग घेतल्याने राज्यातील माध्यमिकच्या शाळा प्रचंड मोठ्या प्रमाणात सुरू होत्या, असे चित्र विभागाच्या अहवालातून दिसून आले आहे.

या भागांत परिणाम नाही
राज्यातील बृहन्मुंबई पश्चिम, ठाणे, पालघर, नंदुरबार, जळगाव, अहिल्यानगर, रत्नागिरी, धाराशिव, अकोला, नागपूर, भंडारा, गोंदिया या जिल्ह्यांत एकूण सर्वच माध्यमिक शाळा सुरू होत्या. या जिल्ह्यांत शाळा बंदचा कोणताही प्रभाव दिसला नाही.