वासिंद आसनगाव रेल्वे स्थानकादरम्यान मालगाडीच्या इंजिनात बिघाड

शहापूर, ता. २७ (बातमीदार) ः वासिंद आसनगाव रेल्वे स्थानकादरम्यान बुधवारी रात्री आठच्या सुमारास डाऊन मार्गावर मालगाडीच्या इंजिनमध्ये बिघाड झाल्याने तब्बल एक तास रेल्वे वाहतूक ठप्प झाली. चाकरमानी प्रवाशांना घरी जायची घाई असताना ऐन गर्दीच्या वेळी झालेल्या या प्रकारामुळे प्रवाशांमधून तीव्र संताप व्यक्त केला जात होता. दुसऱ्या इंजिनची व्यवस्था झाल्यानंतर एक तासाने रेल्वे वाहतूक सुरळीत झाली. यामुळे डाऊन मार्गावरील लांब पल्ल्याच्या अनेक गाड्यांचा खोळंबा झाला असून कसाऱ्याकडे जाणाऱ्या असंख्य प्रवाशांना प्रचंड मनःस्ताप सहन करावा लागला. मालगाडीच्या इंजिनमध्ये वारंवार होणाऱ्या या घटनांकडे रेल्वेप्रशासन कायम दुर्लक्ष करीत असल्याने प्रवाशांना नेहमीच त्रास सहन करावा लागत असल्याबाबत रेल्वे संघटनेचे प्रसिद्धीप्रमुख शैलेश राऊत यांनी नाराजी व्यक्त केली.