तोतया पोलिसांने लुबाडले १ लाख ६१ हजाराचे दागिने

पनवेल : पोलिस असल्याची बतावणी करून एका भामट्याने पनवेलच्या करंजाडे भागात राहणाऱ्या व्यक्तीजवळचे १ लाख ६१ हजार रुपये किमतीचे दागिने लुबाडून पलायन केल्याची घटना उघडकीस आली आहे. पनवेल शहर पोलिसांनी या घटनेतील तोतया पोलिसाविरोधात फसवणुकीचा गुन्हा दाखल करून त्याचा शोध सुरू केला आहे. या प्रकरणात लुबाडल्या गेलेल्या व्यक्तीचे नाव अरविंद पोटे (६३) असे असून ते पनवेलमधील करंजाडे सेक्टर-५ मध्ये राहण्यास आहेत.

बुधवारी सकाळी पोटे हे स्कुटीवरून पनवेल येथे ब्लड रिपोर्ट आणण्यासाठी गेले होते. तेथून परतत असताना, दुपारी १२ वाजण्याच्या सुमारास सेक्टर-४-५ येथील क्रिकेट ग्राऊंडजवळ मोटारसायकलवरून आलेल्या एका तोतया पोलिसाने त्यांना अडविले. त्यानंतर त्यांचे खिसे तपासण्यास सुरुवात केली. त्यानंतर तोतयाने पोटे यांना अंगावरील दागिने काढण्यास सांगून त्यांच्याजवळ असलेल्या रुमालात काढून ठेवण्यास सांगितले. त्यानुसार पोटे यांनी सोन्याच्या कडा, सोन्याची अंगठी, चेन काढून ते रुमालात ठेवल्यानंतर तोतया पोलिसाने सदरचे दागिने रुमालात बांधून देण्याचा बहाणा करून त्यातील सर्व दागिने काढून घेतले. त्यानंतर गाठ मारलेला रुमाल पोटे यांच्या स्‍कूटीच्या डिकीमध्ये ठेवून पळ काढला.