कळंबोलीतील रस्त्यांच्या दुरुस्तीला प्रारंभ

नवीन पनवेल, ता. ३ (वार्ताहर) : कळंबोली प्रभाग क्रमांक दहा येथील भारत गॅस नाका ते पोलिस ठाणे ही जलवाहिनी बदलण्यासाठी मुख्य रस्ता खोदण्यात आला होता. जलवाहिनी टाकण्याचे काम पूर्ण होऊन अनेक दिवस उलटले; मात्र रस्त्याची कामे अपूर्ण असल्याने नागरिकांना नाहक त्रास होत होता. याबाबत नगरसेवक विजय खानावकर यांनी पाठपुरावा केला होता. या रस्त्याच्या कामाची सुरुवात विजय खानावकर यांच्या हस्ते कामाला सुरवात करण्यात आली. भारत गॅस ते पोलिस ठाणे या रस्त्यालगत अनेक गॅरेज आहेत. त्यामुळे या ठिकाणी वाहतूक कोंडी असते. येथील रहिवासी आणि पादचारी वाहनचालकांना खड्ड्यातून वाट काढावी लागत होती. मात्र आता पादचाऱ्यांना रस्त्यावरून ये-जा करण्यास सोईचे होणार आहे. या वेळी काँग्रेस पक्षाचे नगरसेवक विजय खानावकर यांच्यासह सिडकोचे अधिकारी, नागरिक उपस्थित होते.