नगरपरिषद कर्मचाऱ्यांचे काम बंद

उरण, ता. ३ (वार्ताहर) : नगरपालिका व नगरपंचायत कर्मचारी, सवर्ग कर्मचारी सफाई कामगारांनी सोमवारपासून (ता. २) राज्यात बेमुदत काम बंद आंदोलन करण्यास सुरुवात केली आहे. या संपात उरण नगरपालिकेमधील ७४ कर्मचारी सहभागी झाले आहेत. त्यामुळे उरणमधील नगरपरिषदेचे कामकाज ठप्प झाले आहे.

राज्यातील नगरपालिका व नगरपंचायत कर्मचाऱ्यांना प्रत्येक महिन्याच्या एक तारखेला शंभर टक्के वेतन कोषागारामार्फत मिळावे, सहायक वेतन अनुदानाऐवजी वेतन अनुदान मंजूर करावे, कर्मचाऱ्यांना आश्वासित प्रगती योजनेचा लाभ द्यावा, सातव्या वेतन आयोगाच्या फरकाचे तीन हप्ते मिळावेत, हंगामी व ठेकेदार कर्मचाऱ्यांना समान कामाला समान वेतन या सर्वोच्च न्यायालयाच्या निर्णयाप्रमाणे वेतन मिळावे, तसेच सर्व कायदेशीर लाभ मिळावेत, अशा विविध मागण्या करण्यात आल्या आहेत. राज्य सरकारने मागण्यांकडे सातत्याने दुर्लक्ष केल्याचे कर्मचाऱ्यांचे म्हणणे आहे. तसेच नगर विकास मंत्री एकनाथ शिंदे यांच्याबरोबर ऑनलाईन बैठकीतही समाधानकारक तोडगा निघालेला नाही. त्यामुळे या संपात उरण नगरपरिषदेचे ७४ कामगार सामील झाल्याची माहिती कामगारांचे नेते सुरेश पोसतांडेल यांनी दिली.

या संपामुळे नगर परिषदेच्या कामकाजावर परिणाम झाला असल्याची माहिती उरण नगरपरिषदेचे मुख्याधिकारी संतोष माळी यांनी दिली.