धारावीत पोलिसांमुळे शांतता

धारावी, ता. ४ (बातमीदार) : धारावीतही मुस्लिम समुदायाची मोठी लोकसंख्या आहे.अनेक ठिकाणी मुस्लिमांच्या मशिदी आहेत. मंगळवार रात्रीपासून धारावी पोलिस ठाणे व शाहूनगर पोलिस ठाणे हद्दीतील मनसेच्या पदाधिकाऱ्यांना पोलिसांनी नोटिसा बजावल्या होत्या. त्याचसोबत मशिदींच्या प्रमुखांना भोंगा वाजवण्यासाठी परवाना नसेल तर भोंग्यांवर अजान दिली जाऊ नये अशा सूचना दिल्या होत्या. त्यामुळे आज वातावरण सांत होते.
पोलिसांनी कठोर भूमिका घेतल्याने धारावीत शांतता होती. धारावीतील सर्व व्यवहार सुरळीत सुरू होते. सकाळी मुंबईचे पोलिस आयुक्त संजय पांडे यांनी धारावीत येऊन भेट दिल्याने पोलिसांचे मनोधेर्य वाढले. गेल्या अनेक दिवसांपासून पोलिस सामाजिक सलोखा राहावा यासाठी सामाजिक व राजकीय कार्यकर्ते, नेते तसेच सर्वसामान्यंच्या बैठका घेऊन तयारी करत होते. तसेच धारावीतील सर्व रस्त्यांवर व विभागांमध्ये पोलिस रात्रीपासूनच गस्त घालत होते. याचा परिणाम म्हणून इथे कोणताही अनुचित प्रकार घडला नाही.