आरपीआयने दिले मशिदींना संरक्षण

नवी मुंबई, ता. ४ (वार्ताहर) : मनसे अध्यक्ष राज ठाकरे यांनी मशिदीवरील भोंग्यांविरोधात आवाज उठविल्याने मनसेचे पदाधिकाऱ्यांनी आंदोलन करण्यास सुरुवात केली आहे. सध्या संपूर्ण राज्यात तणावाचे वातावरण निर्माण झाले असताना नवी मुंबईतील रिपब्लिकन पक्षाच्या पदाधिकाऱ्यांनी तुर्भे स्टोअर येथील तीन मशिदींना संरक्षण दिले. तसेच मिठाई व गुलाबांचे वाटप करून सर्वधर्मसमभावाचे दर्शन घडविले.
रिपब्लिकन पक्षाचे राष्ट्रीय अध्यक्ष केंद्रीय मंत्री रामदास आठवले यांच्या आदेशानुसार नवी मुंबईतील रिपब्लिकन पक्षाच्या पदाधिकाऱ्यांनी बुधवारी तुर्भे स्टोअर येथील तीन मज्जीदना संरक्षण देत, मुस्लिम समाज के सन्मान में, आरपीआय मैदान में, हम सब एक हें, हिंदू- मुस्लिम भाई भाई अशा घोषणा देत मुस्लिम बांधवांना गुलाबाचे फूल व मिठाई वाटप केले. यावेळी रिपब्लिकन पक्षाचे जिल्हाध्यक्ष सिद्राम ओहोळ यांनी धार्मिक- जातीय तेढ निर्माण करून कायदा सुव्यवस्था बिगडवण्याचा प्रयत्न करणाऱ्यांना रिपब्लिकन पक्ष जशास तसे उत्तर देईल, असा इशारा दिला.
यावेळी मुस्लिम समाजाचे नेते आलम बाबा, पक्ष निरीक्षक बाळासाहेब मिरजे, ज्‍येष्ठ उपाध्यक्ष नागेश कांबळे, युवा नेते यशपाल ओहोळ, शीला बोदडे, रमेश बोदडे, आयुब खान इमरान शेख, अभिमान जगताप, विनोद वानखेडे, संजू कांबळे, फयाज शेख, मंगेश शिंदे, सिद्धार्थ शिरसाट, राहुल साबळे, विनोद दुपरगावडे आदी पदाधिकारी उपस्थित होते.