महाविकास सरकारचा निषेध करण्यासाठी भाजपचे आंदोलन

पालघर, ता. ६ (बातमीदार) : महाविकास आघाडी सरकारच्या नाकर्तेपणामुळे पुन्हा न्यायालयाने ओबीसी आरक्षण बाजूला ठेवून निवडणुका घेण्याचे आदेश दिल्यामुळे राज्याच्या आघाडी सरकारचा निषेध करण्यासाठी शुक्रवारी संध्याकाळी पालघर हुतात्मा चौकाजवळ भाजपच्या जिल्हा कार्यकर्त्यांनी आंदोलन करत मुंडन करून सरकारचा निषेध केला. महाविकास आघाडी सरकार न्यायालयात सातत्याने ओबीसीची बाजू मांडण्यात असमर्थ ठरली आहे. महाविकास आघाडी सरकारची ओबीसींना राजकीय आरक्षण मिळवून देण्याची इच्छा नाही, अशा सरकारचा आम्ही निषेध करीत आहोत, असे भाजपच्या जिल्हाध्यक्षांनी भाषणात सांगितले. या आंदोलनात भाजपचे जिल्हा उपाध्यक्ष प्रशांत पाटील यांनी मुंडन करून सरकारचा निषेध केला; या वेळी भाजपचे जिल्हाध्यक्ष नंदकुमार पाटील, उपाध्यक्ष प्रशांत पाटील, जिल्हा संघटक संतोष जनाठे, जिल्हा सरचिटणीस सुजित पाटील, सरचिटणीस सुशील औसारकर, नगरसेवक भावानंद पाटील, अरुण माने व भाजप कार्यकर्ते उपस्‍थित होते.