आठ दिवसांत ७० जणांना सीटी स्कॅनचा लाभ

वाशी, ता. ७ (बातमीदार) : कोरोना काळात सामाजिक दायित्व निधीतून घेण्यात आलेली सीटी स्कॅन यंत्रणा आता वाशी येथील पालिका रुग्णालयात बसवण्यात आली आहे. यामुळे सीटी स्कॅनसाठी गरीब रुग्णांना भुर्दंड आता बसणार नाही. ही सेवा आठ दिवसांपासून सुरू करण्यात आली असून आतापर्यंत ७० गरीब रुग्णांना याचा लाभ झाला आहे.

वाशी येथे पालिकेचे ३०० खाटांचे प्रथम संदर्भ रुग्णालय आहे. या रुग्णालयात रुग्णांची सतत गर्दी असते. वाशी रुग्णालयात यापूर्वी एका खासगी संस्थेच्या मदतीने पालिका ही सुविधा देत होती; मात्र अपुरे डॉक्टर, औषधांचा तुटवडा अशा अनेक समस्यांना वारंवार सामोरे जावे लागत होते; परंतु कोरोनानंतर नवी मुंबईतील आता आरोग्य सुविधांमध्ये चांगला बदल पाहायला मिळत आहे. कोरोनाकाळात पालिकेला मोठी आरोग्य यंत्रणा उभी करावी लागली. आता या सर्व सुविधा इतर आजारांच्या रुग्णांसाठी वापरता येणार आहेत. यातील महत्त्वाची सुविधा म्हणजे नेरूळ येथील प्रयोगशाळा असून तीही पुढील काळात सामान्य रुग्णांसाठी उपलब्ध करून देण्यात येणार आहे.

कोरोनाच्या काळात १.९० कोटी रुपयांच्या सामाजिक दायित्व फंडातून सीटी स्कॅन यंत्रणा घेण्यात आली होती. सिडको प्रदर्शनी केंद्रात आतापर्यंत कोरोना रुग्णांसाठी या यंत्रणेचा वापर करण्यात आला होता. मात्र आता कोरोनाची परिस्थिती अत्यंत नियंत्रणात असल्याने ही यंत्रणा पालिकेच्या मध्यवर्ती वाशी रुग्णालयात हलवण्यात आली आहे.

मोफत सुविधा मिळणार
शहरातील ज्येष्ठ नागरिक, बीपीएल नागरिक, अपंग यांना ही सुविधा मोफत मिळणार असून तीन लाखांच्या आतील उत्पन्न असलेल्यांना ५० टक्के सवलत दिली जाणार आहे.

आजाराचे निदान करण्यासाठी आवश्यक असलेली सीटी स्कॅन सुविधा महापालिकेच्या इतिहासात पहिल्यांदा वाशी रुग्णालयात सुरू झाली आहे. त्यामुळे हजारो रुग्णांचा फायदा होणार असून शहरातील रुग्णांना चांगली सुविधा मिळत आहे.
- डॉ. प्रशांत जवादे, प्रमुख, वाशी रुग्णालय