मोबाईल चोराला नागरिकांनी पकडले

मानखुर्द, ता. ७ (बातमीदार) ः रस्त्याच्या कडेने चालत निघालेल्या महिलेच्या हातातील मोबाईल हिसकावून पळालेल्या चोराला नागरिकांनी पाठलाग करून पकडले व पोलिसांच्या ताब्यात दिले. चेंबूरच्या घाटला परिसरात गुरुवारी (ता. ५) सायंकाळी ही घटना घडली.
पकडलेल्या चोरट्याचे नाव जावेद शेख (वय ३३) असून त्याच्या साथीदाराचा शोध पोलिस घेत आहेत. जावेद याच्याविरोधात पार्कसाईट, विक्रोळी तसेच टिळकनगर पोलिस ठाण्यात याआधीच्या गंभीर गुन्ह्यांची नोंद आहे. घाटला परिसरातील केळकर वाडी येथे राहणारी महिला दीपाली सोनावणे गुरुवारी सायंकाळी कामावरून घरी चालत निघाली होती. ती केळकर वाडीजवळ आली असताना तिच्याजवळ एक रिक्षा येऊन थांबली. त्यात बसलेल्या जावेदने तिच्या हातातून मोबाईल हिसकावला व रिक्षात बसून पळ काढला. महिला व परिसरातील नागरिकांनी रिक्षाचा पाठलाग केला. ती रिक्षा नीलम जंक्शनजवळ असताना पाठलाग करणाऱ्या महिला व नागरिकांनी जावेदला पकडून गस्तीवरील पोलिसांच्या ताब्यात दिले. त्याच्याविरोधात गुन्हा नोंदवत गोवंडी पोलिसांनी त्याला अटक केली. चोरलेला मोबाईल घेऊन पळालेल्या त्याच्या साथीदाराचा शोध पोलिस घेत आहेत.