आम आदमी पक्षाचा कल्याणमध्ये मोर्चा

कल्याण, ता. ९ (बातमीदार) ः कल्याण-डोंबिवलीमधील कोरोना योद्ध्यांना पुन्हा नोकरीवर घ्यावे आणि बंद पडलेली रुग्णालये सुरू करावीत, या मागणीसाठी आम आदमी पक्षाने सोमवारी पालिका मुख्यालयावर मूक मोर्चा काढत आपला निषेध व्यक्त केला.
कल्याण-डोंबिवली पालिकेच्या वैद्यकीय आरोग्य विभागामार्फत कोरोना काळात पालिका आणि कोव्हिड केंद्रात सेवा देण्यासाठी खासगी तत्त्वावर नोकरभरती केली होती. मात्र, कोरोना रुग्ण कमी झाल्याने अनेक कोव्हिड केंद्र बंद करत कर्मचाऱ्यांना कामावरून कमी करण्यात आले, अशा कोव्हिड योद्ध्यांसाठी आम आदमी पक्षाने सोमवारी पालिकेच्या रुक्मिणीबाई रुग्णालय ते पालिका मुख्यालय पदयात्रेद्वारे तोंडाला काळ्या फिती लावून मूक मोर्चा काढत पालिका प्रशासनाचे लक्ष्य वेधले.
आम आदमी पक्षाचे ठाणे जिल्हा सचिव विनोद गुप्ता, अक्षरा पटेल, सचिन जोशी, सुनील वेंगुर्लेकर आदींच्या शिष्टमंडळाने पालिका अधिकाऱ्यांची भेट घेत वैद्यकीय आरोग्य सेवेच्या समस्यांचे निवेदन दिले.