एम. पूर्व कार्यालयात संयुक्त जयंती महोत्सव

मानखुर्द, ता. १० (बातमीदार) ः गोवंडी येथील एम पूर्व कार्यालयाच्या आवारात शुक्रवारी (ता.६) तथागत गौतम बुद्ध, छत्रपती शिवाजी महाराज, महात्मा जोतिबा फुले व डॉ. बाबासाहेब आंबेडकर यांच्या जयंतीचा संयुक्त महोत्सव साजरा करण्यात आला. एम पूर्व कार्यालयातील संयुक्त जयंती महोत्सव कमिटीने हे आयोजन केले. एम पूर्व विभागाचे सहायक आयुक्त महेंद्र उबाळे हे या आयोजनाचे अध्यक्ष होते. अधिकारी व कर्मचाऱ्यांच्या पुढाकाराने दरवर्षीप्रमाणे याही वर्षी संयुक्त जयंती महोत्सव मोठ्या उत्साहात साजरा करण्यात आला. या वेळी लोकशाहीर सीमा पाटील यांच्यासह भीमगीतांचा जल्लोष या कार्यक्रमातील गायकांनी उपस्थितांना मंत्रमुग्ध केले. या आयोजनाचे सूत्रसंचालन सतीश जामसंडेकर यांनी केले. यावेळी सहायक अभियंता अतुल कोल्हे, सहायक मुख्य पर्यवेक्षक एम. एच. मोमीन यांच्यासह कार्यालयातील सर्व सहकारी सहभागी झाले होते.