पालिकेच्या कर्मचाऱ्यांचे थकीत वेतन द्यावे

बेलापूर, ता. १० (बातमीदार) : मूषक नियंत्रण कामगारांचे मार्च, एप्रिल या महिन्यांचे थकीत वेतन मिळण्याबाबत, तसेच या कामगारांच्या वेतनवाढीतील फरक कामगारांना त्वरित देण्याचे संबंधितांना निर्देश देण्याची लेखी मागणी समाजसेवक संदीप खांडगे-पाटील यांनी आयुक्त अभिजित बांगर यांच्याकडे केली आहे. मे महिन्याची दहा तारीख आली असतानाही पालिका क्षेत्रात मूषक नियंत्रणाचे काम करणाऱ्या कामगारांना मार्च व एप्रिल महिन्याचे वेतन मिळालेले नाही. महापालिकेत काम करणाऱ्या कायम कर्मचारी व अधिकारी, ठोक मानधनावरील, तसेच कंत्राटी कामगारांचे सर्वांचेच वेतन झालेले आहे. गेल्या काही वर्षांपासून महापालिका प्रशासनाच्या वेतन विलंबामुळे आर्थिक ससेहोलपट केवळ मूषक नियंत्रण कामगारांचीच होत आहे. या समस्येबाबत त्यांनी मुख्यमंत्री उद्धव ठाकरे यांनाही स्वतंत्रपणे निवेदन सादर केले आहे.