१८ लाखांचे मोबाईल चोरणार तरुण जेरबंद

उल्हासनगर, ता. १० (वार्ताहर) ः छत्रपती शिवाजी महाराज चौकात असलेले मोबाईल दुकान फोडून त्यातील तब्बल १८ लाख ७२ हजार रुपयांचे मोबाईल चोरणाऱ्या तरुणाला पोलिसांनी अटक केली आहे. कर्तव्यदक्ष बिट मार्शलमुळे या चोराला अटक करण्यात पोलिसांना यश आले. अटक केलेल्या आरोपीचे नाव महम्मद फिरोज नईम अहमद खान ऊर्फ मोनू असे आहे.
बिट मार्शल, पोलिस नाईक अशोक मोरे व पोलिस शिपाई राजेंद्र कोंगे हे उल्हासनगर रेल्वे स्थानक परिसरातील संजय गांधी नगर भागात गस्तीवर असताना मोनू त्यांना संशयास्पद हालचाली करताना दिसला. त्याची कसून चौकशी केली असता त्याच्या हातातील पिशवीत असंख्य मोबाईल आढळून आले. त्यामुळे पोलिसांचा संशय अधिक बळावला. पोलिसांनी अधिक चौकशी केली असता त्याने चोरी केल्याचे कबूल केले.

मौजमजेसाठी चोरी
आरोपी मोनू हा अंबरनाथमधील नॅनो सिटी या उच्चभ्रू सोसायटीत राहतो. यापूर्वी त्याने अंबरनाथ पोलिस ठाण्याच्या हद्दीत २२ लाखांचे मोबाईल लंपास केले होते. मोबाईल विकून आलेल्या पैसे तो मौजमजेसाठी वापरत होता. पोलिसांनी त्याला अटक केली असता त्याची बाजारपेठेतून धिंड काढली.